ladicte terre et seignourye du Manoir tenue de l'abbaie de Samer au bois, scituée au Conté de Boullenois, à cause de la quelle seignourie A ledict Guy disque s du Manoir droict d'avoir et prendre par chascun an, en la forest de Boullongne, appartenant au Roy, la couppe et tonture d'une mesure de bois, ce quil dict sçauoir pour en auoir veu joïr dès sa joeunesse Jehan et Anthoine Roussel, frères, lesquelz en leur vivant estoient Srs du Manoir; comme aussy Il a veu damoiselle Marguerite Roussel fille et héritière dudict feu Jehan, lors allyée auecq ung nommé Jacques de Blancquebourne qui en auoit joÿ tant et jusques ad ce que par accord faict auecq une nommée damoiselle Jehenne de Licques, vefve dudict feu Jehan Roussel, elle l'auroit baillée pour en joïr par ladicte Jehenne de Licques sa vie durant par forme d'usuffruict, et a ladicte Jehenne joÿ paisiblement et sans contredict jusques en l'an 1544 que le païs de Boullenois fut pillé, sacagé et ruyné, et la ville de Boullongne prinse par les Angloix, et quoy que ladicte terre appartint au sieur du Manoir, qui le produict, quelques années au paravant ladicte prinse de Boullongne, Sy esse quil ne debvoit joïr dudict droict de la couppe d'icelle mesure de bois que apprès le trespas de la vefve dudict Roussel, à laquelle elle estoit laissée par usuffruict, suivant l'acord faict avecq ladicte vefve quil a aultrefois veu et leu, auquel temps ladicte Jehenne Roussel, comme feirent la plus part des habitans se retira hors de ladicte conté auecq madame de Neelles, auquel lieu l'on disoit quelle auoit une fille; ce qu'il dict sçauoir et en auoir parfaite congnoissance pour

l'auoir veu plusieurs fois amener (1) audict lieu du Manoir et deliurer ausdicts Roussel et ses heritiers, et se mesuroit ledict bois par ledict mesureur juré du Roy auecq le bois d'usaige que l'on assignoit aux officiers de la ville de Boullongne et par mesme moïen s'en faisoit délivrance audict sieur du Manoir; laquelle seignourie avecq ledict droict de ladicte mesure de bois auroit esté acquise audict Guy disque, qui n'en auroit peu joïr à cause des guerres survenues et aussy quil fust delaissé myneur et en bas eage, eagé seullement de huit mois lors du decedz de sondict père, n'estant pour le present que l'aage de quarante et ung à quarante deux ans, pour ce quil fust né en l'an 1536, ce que luy depposant sçait pour avoir escript et enregistré dans ung livre les noms et naissance des enffans dudict sieur disque, qui fust perdu en la ville de Boullongne et depuis en feist mention et l'escriuit sur son brevière quil a encores pour le present en son bras?, pendant la mynorité duquel ses tuteurs et curateurs nen auoient faict poursuicte et mesmes ledict disque venu en eage n'y auroit prins grand esgard ny eu le loisir de ce faire pour ce quil se seroit pour la pluspart du temps trouué absent de sa maison, aïant emploïé son eage à porter les armes. pour le Roy ès guerres tant estrangières que ciuilles. où Il contynue encore, estant mareschal des logis de la compaignie d'ordonnance de Mgr de Piennes, gouuerneur pour le Roy en la ville de Metz et païs Messin; ne sçait sy l'on a presenté les adueuz et dénombremens de ladicte terre du Manoir aux bailly

(1) Le bois...

et hommes de l'abbaye de Samer, mais a fort bonne congnoissance que ladicte terre et seignourie du Manoir est tenue et mouuante de ladicte abbaie de Samer, à cause de la seignourie de Hesdin labbé qui est le chef lieu, estant ladicte terre de Hesdin labbé fief admorty comme il a tousiours entendu des antiens abbez et r(ecepveu)rs de ladicte abbaye. Sy a dict avoir veu, leu, tenu et gardé à son logis audict lieu d'Isque, ung fort antien et anthicque adveu et denombrement de l'abaye de Samer présenté au Conte de Boullongne, et ouquel estoit le recepisse où estoit narré fort long qui à cause de ladicte maison, terre et seignourie du Manoir, lieu principal de la seignourie de Hesdin labbé tenu de ladicte abbaye, le sieur du Manoir avoit droict de prendre et auoir par chascun an une mesure de bois d'usaige en la forest de Boullongne qui se debvoit delivrer audict sieur du Manoir apprès le bois d'usaiges des officiers de ladicte Conté. N'a bonnement souuenance de quelle dacte estoit ledict rapport, adveu et recepisse, toutesfois quil estoit fort antien et encores bien entier et croist en sa conscience quil estoit au precedent les admortissemens desdictz fiefz de Hesdin l'abbé. Sy dict que peu au paravant que les Angloix vindrent assiéger la ville de Boullongne en l'an cincq cens quarante quatre Il porta les adveu et recepisse avecq plusieurs aultres lettrez et tiltres qui appartenoient audict sieur du Manoir et ses freres en ladicte ville de Boullongne au logis de leur mere grand, auquel lieu il sçait quilz ont estez perduz, brulez et adhirez auecq ses lettres mesmes de (s)a pbrestrise quil auoit serrées auecq les tiltres desdicts sieurs, comme furent aussy bruslez et

perduz les lettres et tiltres de plusieurs bourgeois de ladicte ville et les registres de la justice, tant de la Seneschaulcée que des eaues et forestz, ce quil dict ( sçauoir) pour auoir esté en ladicte ville de Boullongne pendant que lesdicts Angloix le détenoient et durant la paix faicte entre le Roy très crestien et le Roy d'Angleterre, et auoir veu que tout estoit prins et perdu en ladicte maison en laquelle il entra pour recouurer lesdictz tiltres et ceulx qui luy appartenoient Dict en oultre auoir bonne congnoissance que l'abbaie de Samer a esté bruslée par deux diuerses fois par les bourguignons, sçauoir est en l'an 1522 que l'on appelle l'année des grands feux et encores une fois deppuis sans que toutesfois Il puist cotter l'année de la seconde ruyne, et sçait que en ladicte abbaie furent perduz, bruslez et adhirez la plus part des tiltres, chartres, admortissemens, adueuz et denombremens et aultres pappiers et enseignemens, sans la perte desquelz se pourroit aisément monstrer ce qu'il dict auoir veu et leu audict adveu et recepisse quil auoit porté en ladicte ville de Boullongne où Il fust perdu à la prinse d'icelle par les Angloix, auquel il est certain et a bonne souuenance d'auoir leu que tel droict d'usaige appartenoit à celluy qui estoit Seigneur du Manoir et dont y auoit recepisse dudict Conte de Boullongne, fort ancien comme il est dict cy dessus et a signé : Taxé

XVI S.

Jehan du perron, laboureur, demourant à hesdin l'abbé, eagé de 80 ans ou environ, tesmoing juré et oy sur les mesmes faicts et articles du tesmoing précédent apprès serment par luy faict de dire vérité, a

dit quil est natif du villaige de hesdin labbé, duquel lieu est la terre et seignourie du Manoir, tenu de l'abbaie de Samer en ceste Conté de Boullenois et a eu congnoissance de son joeune eage de deffunct Lois. Roussel, père de Jehan Roussel et de ses enffans et héritiers qui tous ont esté consécutivement sieurs du Manoir, tant que ladicte terre et seignourie a esté acquise par feu Adrien disque, escuier, sieur dudict lieu, père du sr du Manoir qui est à présent, lequel en joist suivant l'acquisition faicte par sondict père : Est bien certain que lesdicts Lois et Jehan Roussel, père et fils, ont consecutivement joy tout leur vivant de la couppe et tonture d'une mesure de bois qui se prenoit en la forest de Boullongne appartenant au Roy, apprès les usaiges fourniz aux officiers de la ville et estoit délivrée ladicte mesure de bois par les officiers des forestz, aïant esté laïée et mesurée séparément par le mesureur ordinaire du Roy, ce quil dict sçauoir pour auoir veu par plusieurs années amener le bois de ladicte forest en la maison du Manoir et que le chariot des sieurz du Manoir y alloit par chascun an et ordinairement quérir et charier ledict bois que l'on disoit provenir et estre amené de ladicte forest pour le droict d'usaige de ladicte mesure de bois, qui leur appartenoit, ce qui s'est continué estre déliuré à sa congnoissance deppuis son joeune. eage jusques à la prinse de Boullongne faite par les Angloix en l'an 1544, Et a fort bonne souuenance que l'usuffruict de la couppe de ladicte mesure de bois fust delaissée à la vefve dudict feu Jehan Roussel, nommée dlle Jehenne de Licques qui en debuoit joïr sa vie durant, et n'en debuoit riens avoir ledict Guy